Nagpagwa sang Executive Order No. 66 series of 2020 si Bacolod City Mayor Evelio “Bing” Leonardia tuhoy sa patigayunon nga swab testing sa tatlo ka dalagko nga merkado sa ciudad.
Santo sa EO, magapatigyaon sang mandatory surveillance testing sa Central, Burgos kag Libertad Public Market nga ginduso sang Emergency Operation Center (EOC) nga ginapangunahan ni Inter-Agency Task Force (IATF) deputy chief implementer for Visayas Gen. Melquiades Feliciano.
Nakabutang man diri ang implementasyon kag programa natuhoy sa aktibidad.
Nahibaluan nga nakabutang sa letter sang EOC sadtong Setyembre 29 nga dapat gilayon ang estrikto nga pagpatuman sang Quick Response Team.
Magagamit man sang ticket system kun sa diin paga-isyuhan sang permission ticket ukon market pass ang mga vendors nga magapakuha sang swab test.
Pagabutangan man ang mga stall sini sang notice of compliance.
Samtang ang mga magapositibo naman ang kuhaon kag ibutang sa mga isolation facilities.
Santo naman sa zoning sang mga market vendors, kun may mga magapositibo sa mga ini, ang nabilin nga negatibo sa grupo ang sarang gihapon nga makabaligya sa merkado.
Samtang ang mga hatagan naman sang otorisasyon sang nagpositibo nga magbaligya sa pwesto sini, kaangay sang mga kaanak ang dapat lang nga magpaidalum sa rapid diagnostic test.
Samtang kun indi naman magpasugot ukon padayun nga nagapamalibad ang market vendor, pagabutangan naman sang notice ang pwesto nga “”under process” ukon “in process”.
Ang indi magasunod sa Executive Order ang sarang nga makasuhan sang administratibo ukon criminal case.
