Patay ang engineer nga nagamaneho sang pick-up matapos nga gina-alegar nag-agaw sang lane kag nagbunggo sa isa ka wing van sa Bacolod-Silay Access Road, Hda. Divine Lopez, Barangay Efigenio Lizares, Talisay City kaina sang aga.
Ginkilala ang biktima kay Glenn John Nemenzo kag residente sang Villa Angela Subd., Barangay Villamonte, Bacolod City samtang ang driver naman sang wing van amo si Dionesio Ygay, 34-anyos kag residente sang Barangay Bairan, Vallehermoso, Negros Oriental.
Sa interview sang Bombo Radyo Bacolod kay P/Staff Sgt. Docelio Pachoro, imbestigastor sang Talisay City Police Station, ginpahayag sini nga nagabiyahe nagikan sa south to north direction ang Toyota Hilux nga pick-up sang nasugata sini ang Fuso wing van nga naga-dalagan naman sa pihak nga direksyon.
Suno kay Pachoro, gina-alegar sang driver sang wing van nga madasig ang pagmaneho ni Nemenzo kag gin-agaw sini ang iya nga lane.
Pahayag pa ni Ygay nga nagtinguha pa ini nga maglikaw apang nagbunggo gid diri ang pick-up.
Bangud sa mabaskog nga impact, nag-guluwa sa salakyan ang biktima kag nakaangkon sang patal nga pilas kun sa diin gindeklarar ini nga dead on the spot.
Total-wrecked naman ang pick-up ni Nemenzo matapos nga nagkaya gid ini.
Sa karon suno kay Pachoro, temporaryo nga yara sa custodial facility sang Talisay City Police Station si Ygay para sa nagakaigo nga disposisyon.
Ginahulat man sang imbestigador ang desisyon sang pamilya sang biktima kun mapasaka sila sang kaso batok sa driver sang wing van.
