Wala sang plano nga magpalagyo ang driver sang wing van nga nabungguan sang pick-up nga ginaalegar nag-agaw sang lane sa Bacolod-Silay Access Road, Hda. Divine Lopez, Barangay Efigenio Lizares, Talisay City kahapon sang aga bangud nagapanindugan ini wala ini sang sala.
Madumduman nga nagabyahe nagikan sa south to north direction ang Toyota Hilux nga pick-up nga ginamaneho sang engineer nga si Glenn John Nemenzo, residente sang Villa Angela Subd., Barangay Villamonte, Bacolod City sang nasugata sini ang Fuso wing van nga naga-dalagan naman sa pihak nga direksyon.
Ang nasambit nga van ang ginamaneho ni Dionesio Ygay, 34-anyos kag residente sang Barangay Bairan, Vallehermoso, Negros Oriental.
Gina-alegar ni Ygay nga madasig ang pagmaneho ni Nemenzo kag gin-agaw sini ang iya nga lane.
Suno diri, nagtinguha pa ini nga maglikaw apang nagbunggo gid diri ang pick-up.
Bangud sa mabaskog nga impact, nag-guluwa sa salakyan si Nemenzo kag nakaangkon sang patal nga pilas kun sa diin gindeklarar ini nga dead on the spot.
Sa interview sang Bombo Radyo kay Ygay, ginpahayag sini nga siya ang nalipungan matapos magbunggo ang Toyota Hilux sa iya salakyan kag sang nakabugtaw ini, madamo na sang tawo sa palibot.
Suno diri, nanaog ini kag nagpungko lang sa higad.
Suno sa iya, wala gid nagsulod sa iya panghuna-huna nga magpalagyo bangud wala man siya sang sala.
Sa karun, wala pa si Ygay nakaistorya sa pamilya sang biktima kag nagahulat naman ini nga makaistoryahanay sang iya kompaniya.
Nahibaluan nga isa ka tuig na nga nagamaneho sang wingvan si Ygay kun sa diin nagadul-ong ini sang mga kabilya sa isa ka hardware store gani suno diri, kabisado na niya ang dalan nga masami sini nga ginaagyan.
