Aminado ang isa ka ginikanan sa syudad sang Bacolod nga may kabudlayan ang paggamit sang module ang mga estudyante subong nga School Year 2020-2021.
Sa interview sang Bombo Radyo Bacolod kay Marlon Deriada, presidente sang Banago-Sibucao Tricycle Operators and Drivers Association, may yara sang kabudlayan ang pag-eskwela sang mga kabataan ilabi sa karun nga nagagamit sang module.
Suno diri, may kabudlayan sila nga mga ginikanan sa pagtudlo bangud nga may mga pamangkot nga budlay sabtan.
Suno pa kay Deriada, sa baylo nga makalakat pa ang asawa sini agud nga makapangita man sang kwarta nga makatimbang man sa iya, magapabilin na lamang ini sa ila balay agud nga matatapan ang duha ka mga kabataan.
Makahalam-ot man suno kay Deriada bangud ang ginikanan ang nangin manunudlo na kag nagauyat naman sang stick kun nagapasaway ang bata.
Sadto ginakondenar sang mga ginikanan ang mga manunudlo bangud sa ginaistriktuhan ang mga kabataan apang sa karun, naintindihan na nila ang mga ginahimo sang mga manunudlo.
