Ginkabig naman ni Bacolod City Inter-Agency Task Force against COVID chair Vice Mayor El Cid Familiaran nga fake news ang mga naggwa nga balita nga ginpaduty pa ang call center employee apisar nga nagpositibo ini sa COVID-19.
Suno kay Familiaran, wala man siya sang nabaton nga report kaangay sang issue bangud ginsapol na nila sadto ang mga site directors nga responsibilidad nila ang mga nagakalatabo sa tagsa nila ka mga empleyado.
Apang ginpahayag man sini nga dako ang salabton sang employer kun matuod ang ginpadangat nga impormasyon sa Bombo Radyo Bacolod nga may yara sang empleyado sa isa ka BPO company nga positibo ini kag may sintomas ang ginpaduty sa gihapon.
Suno kay Familiaran, dako ang salabton sang kompaniya bangud ginbutang sang employer sa risgo ang kabuhi sang mga empleyado sabaylo nga proteksyunan nga indi malatnan sang balatian.
Nagpanawagan man ini sa publiko nga magsuksok sang face mask kag faceshield kag ipractice ang social distancing agud nga mapadayaon ang pagnubo sang kaso sang balatian sa syudad kag makabalik na sa normal ang pagpangabuhi sang tanan.
