Apisar wala sang sala, nagpangayo sang pasaylo ang driver sang 10-wheeler truck nga nabungguan sang isa ka sports car sa Homesite Circumferential Road, Barangay Villamonte, Bacolod City kaina sang kaagahon kun sa diin tatlo ang patay.
Nahibaluan nga padulong sa north direction ang truck nga may karga nga tubo sang ginbungguan ini sang nagasunod nga Ford Mustang.
Sa interview sang Bombo Radyo Bacolod kay P/Major Charles Gever, hepe sang Bacolod Police Station 4, gikan sa birthday party ang mga nagtaliwan nga sanday Stanley Flores, 40-anyos, residente sang Lilcon Village, Barangay Villamonte kag isa ka negosyante, kaupod ang abyan sini nga anay cameraman sang ABS-CBN Bacolod nga si Wilton Porcel, residente sang Barangay Banago kag hinablos ni Porcel nga si Mark Wiljohn.
Suno kay Gever, idul-ong kuntani ni Flores sanday Porcel sa Barangay Banago sang ila nabungguan ang truck nga may karga nga tubo kag ginadala ni Michael Mejica, 42-anyos kag residente sang Barangay Tabugon, Kabankalan City.
Bangud sa kabaskog sang pagkabunggo, nagsuhot sa truck kag total wreck ang sports car kun sa diin dead on the spot ang mga biktima.
Iga-verify pa sang otoridad kun naka-inom gid man ang mga biktima.
Ginkumpirmar naman ni Gever nga yara sa ila kustodiya ang driver sang truck kag ginahulat pa ang desisyon sang pamilya sang mga biktima kun mapasaka sang kaso.
Samtang, suno naman kay Mejica, nakibot kag ginkulbaan man ini bangud nga wala niya ginlauman ang natabo.
Suno diri, mahinay lang ang iya nga pagpadalagan sang truck.
Nagpangayo naman ini sang pasaylo sa pamilya sang mga biktima kag nagalaom nga indi siya pagpasakaan sang kaso bangud nagapati ini nga wala siya sang sala.
Nahibaluan nga nagikan sa La Carlota si Mejica kag padulong kutani ini sa First Farmer’s sa ciudad sang Talisay.
