Nagpasalig ang Inter-Agency Task Force Deputy Implementer for Visayas sa mga pumuluyo sang Bacolod nga may yara sang functional, agresibo kag proactive nga pamaagi ang Emergency Operation Center sa pagpakigbato sa coronavirus sa ciudad.
Sa interview sang Bombo Radyo kay General Melquiades Feliciano, ginpahayag sini nga wala sang rason nga ang EOC ang indi mangin madinalag-on sa pagpakigbato sa COVID ilabi na nga nagaugyon kag nagakooperar ang tanan.
Nahibaluan nga natalana naman nga maghalin sa ciudad si Feliciano sini nga bulan apang wala pa sang exact nga petsa.
Samtang, nagpasalig man si Association of Barangay Captains President Lady Gles Gonzales Pallen nga ila padayunon ang mga protocol sang EOC sa mga kabarangayan.
Suno kay Pallen, mas maayo sa karun bangud may koordinasyon na ang EOC sa mga barangay kag ila prayoridad amu ang masustain ang mga ginapatuman nga pagsulundan kag mapadayon ang pagpakigbato sa COVID.
Nagapati naman si Mayor Evelio “Bing” Leonardia nga dako nga bagay ang pagkooperar sang mga pumuluyo bangud kun wala sang kooperasyon, mauyang lang ang ginahimo sang mga opisyales.
Suno sa alkalde, kun tanan ang magbuylog, sarang nga mapanubo pa gid ang kaso sang COVID-19 sa ciudad.
Nagpang-abiso man ini sa mga pumuluyo nga magsunod sa mga health protocols.
