Gin-athag sang officer-in-charge sang Philippine Red Cross (PRC) Negros Occidental chapter nga sarang sa gihapon nga makapa-swab test ang mga PhilHealth member sa molecular laboratory sang PRC apang dapat nga magbayad sang personal ang amo nga persona.
Madumduman Gin-untat na sang Philippine Red Cross, isa ka organisasyon nga nagabulig sa pagpatigayon sang COVID-19 screening sa pungsod, ang mga tests nga ginacharge sa PhilHealth.
Ang desisyon ang bangud sa kapaslawan sang state insurance nga masettle ang nagasaka nga outstanding balance sini nga nagadangat sa P930.99 million.
Sa interview sang Bombo Radyo Bacolod kay PRC Negros Occidental officer-in-charge Rita Benita Mirasol, ginpahayag sini nga nagabaton sila sa gihapon sang mga indibidwal nga miyembro sang PhilHealth apang dapat nga mabayad sila mismo sa molecular laboratory sang Red Cross.
Gin-athag man ni Mirasol nga pwede ini dayon mapa-reimburse sang pasyente sa PhilHealth.
Suno diri, magabulig lamang ang PRC sa paghatag sang mga kinahanglanon agud makapa-reimburse ang pasyente.
Ini ang kaangay na lamang sa pag-release sang case investigation form (CIF), claim summary form, waiver form kag billing statement.
Ginpasiguro naman ni Mirasol nga naka-istoryahanay na sila sang local PhilHealth diri sa probinsya angot sa reimbursement sang mga pasyente nga nagapa-swab sa PRC molecular laboratory nga miyembro sang state-health insurer.
