Masobra 25 mil ang nagpirma sa petisyon sang Amlig Tubig sa pagpugong sa kontrata nga ginsudlan sang Bacolod City Water District (BACIWA).
Suno kay Councilor Wilson “Jun” Gamboa, magluwas sa apelasyon sang Amlig Tubig nagduso naman sang resolusyon ang 12 ka barangay sa ciudad sang Bacolod sa pagpamatok.
Madumduman nga ginkakibot sang kadamuan ang gulpyada nga pagpirmahanay sang BACIWA kag Prime Water sa joint venture agreement sa tunga sang ginapangatubang nga pandemic.
Suno kay Gamboa, apisar ang General Manager mismo ang wala nakahibalo, kag ginpabalo nalang sa ginpatigayon nga presscon nga human na ang kasugtanan kag nakapirmahanay na.
Nagakabalaka naman ini bilang public official, bangod nakita sini nga disbentaha ini sa mga Bacolodnon kag sa ciudad.
Ginakwestyon man sang konehal ang proseso sang pagsulod sa kontrata.
Dugang pa sini nga dapat man tulukon kun bentaha ukon disbentaha ang pagsulod sa isa ka partnership nag dapat naman ma-review bilang public official.
Sa personal nga pagtan-aw ni Gamboa, ang kontrata ang isa ka klaro nga pagtake-over sang kompanya bango wala naman sang ginhatag nga water source, water supply ukon idugang nga kapital ang Prime Water sa pagsulod sa kontrata.
Nagapati ang konsehal nga nakasecure na sang loan para sa kontrata.
Nahibaluan nga nagpahibalo na ang mga bangko nga sarang ang mga ini nga magpahulam sa BACIWA bangod sa mataas sini nga income standing kag maayo nga track record.
Nahibaluan nga ang water utility ang makabig nga isa sa pinakamaayo pinaagi nga makaganar sang income.
Suno kay Gamboa nga ang operasyon sang BACIWA ang sobra pa sa segurado nga sarang makaseguro sang loan sa mga bangko, kaangay nalang sang Land Bank kag Development Bank of the Philippines (DBP) nga handa nga magpahulam sang masobra P3 billion sa ahensya.
Santo naman sa internal feasibility study sang ahensya, ang capital requirement sa rehabilitasyon, ekstensyon kag expansion sang BACIWA ang sarang lang nga magdangat sa duha ka bilyon.
