Aminado ang pinuno sang Negros Occidental Provincial Veterinary Office nga dako gid ang nadula nga kita sang probinsya sa mga gamefowl ukon mga manok nga ginapang-bulang tuga sang coronavirus pandemic.
Sa interview sang Bombo Radyo Bacolod kay Provincial Veterinarian Dr. Renante Decena, ginpahayag sini nga nagadangat lamang sa 3% ukon 500 tubtob 600 ka mga gamefowl nga ready to fight ang mapagwa sang mga breeders sa probinsya humalin sang bulan sang Pebrero sini nga tuig.
Nahibaluan suno kay Decena nga nagadangat sadto sa 15 mil tubtob 20 mil ka mga gamefowl ang mapagwa sang probinsya.
Suno sa pinuno sang PVO, sang una nagakita ang probinsya sang 300 mil tubtob 500 mil pesos kada bulan bangud sa pagkuha sang permit sang mga breeders.
Apang sa karon, nagadangat lamang sa 12 mil pesos ang makita sang opisina.
Aminado man ini nga nangin mapuraot ang nasambit nga sektor bangud nga limitado lamang ang movement sini tuga sang mga restrictions.
Nagalaom naman si Decena nga dako ang mabulig sa ekonomiya sang probinsya pananglitan nga mag-operar liwat ang mga cockfighting activities.
Madumduman nga gintugutan na sang inter-agency task force ang pagbulang sa mga lugar nga yara sa idalom sang modified general community quarantine (MGCQ) apang dapat nga otorisado ini sang mga local government units (LGUs).
