Ginalauman sang executive assistant kag cluster head sang Bacolod City Risk Reduction Management Office ang pag-abot sang mga kagamitan sa pagpaninlo sang mga sapa sa ciudad sini nga bulan kadungan sang pagsugod sang mainulanon nga tiyempo.
Sa interview sang Bombo Radyo kay CDRRMO cluster head Jomarie Vargas, ginpahayag sini nga ila sa karun ginabantayan ang mga sapa sa ciudad bangud sa pagsugod na sang maulanon nga tiyempo nga makatuga sang pagtaas sang tubig.
Suno kay Vargas, indi maayo problema ang mga drainage sang Bacolod apang ang ila ginakahangaw-an amu ang suba sa Brgy. 8 nga nagadalagan halin sa Brgy. 2 tubtob Brgy. 10.
Suno sa iya, magluwas sa mga basura sa suba, kun kaisa ginahimo pa ini poso-negro sang mga pumuluyo gani mabudlay ini para sa mga nagapaninlo.
Gani, suno sa iya, ila ginahulat ang mga kagamitan nga natalana mag-abot sa ciudad sa katapusan nga semana sang Oktubre ukon una nga semana sang Nobyembre agud magamit sa pagtinlo sang mga suba.
Nagpasalig ini nga maskin mag-ulan sa nasambit nga mga petsa, magapadayon sila gihapon sa paghawan diri agud nga malikawan ang pagsaka sang tubig nga makatuga sang pagbaha kag iban pa nga halit.
