Wala na sang kabuhi sang nasapwan ang isa ka 48-anyos nga lalaki nga nagahamyangon sa backseat sang iya nga salakyan sa Purok Lampirong, Barangay 2, Bacolod City kaina sang aga.
Sa interview sang Bombo Radyo Bacolod kay P/Capt. Leo Estopa, hepe sang Bacolod Police Station 2, ang biktima ang ginkilala kay John Cinco kag residente sang Purok Kadena de Amor, Barangay Singcang Airport.
Suno kay Estopa, mga pasado alas-9:00 kaina sang aga sang nasapwan nga patay na sa sulod sang salakyan sini si Cinco.
Mismo ang pamilya sini ang nagpadulong sa police station kag positibo nga ginkilala ang biktima.
Suno sa hepe, wala sang may nakita nga pilas ukon signs of struggle sa lawas ni Cinco.
Apang ila sa gihapon ginpakamaayo nga ipaidalom ang bangkay sini sa autopsy agud mahibaluan kun ano ang ginkamatay sang biktima.
