Ginpasalig sang pinuno sang Department of Social Services and Development (DSSD) sa ciudad sang Bacolod nga nakaabot na sa Jolo, Sulu ang 73 ka mga badjao nga ginpapauli sadtong Oktubre 5.
Sa interview sang Bombo Radyo Bacolod kay DSSD head Pacita Tero, ginpahayag sini nga nagpakig-angot ang Office of the Civil Defense (OCD) Region 6 sa OCD sang Bangsamoro Autonomous Region in Muslim Mindanao agud makumpirmar kun naka-abot na sa Jolo ang mga badjao nagikan sa Bacolod.
Suno kay Tero, ginkumpirmar sang OCD-BARMM nga nakaabot na ang mga badjao sa Mindanao kag naka-quarantine karon sa municipality of Omar.
Ginpasiguro man sini nga nagpanugyan ang OCD-6 sa local govertnment unit sang Zamboanga nga indi pagbatunon sa pagtabok sa ila nga border ang mga badjao agud nga indi na makasakay sa barko padulong sa Dumaguete City.
Samtang, suno kay Tero, antes pa man nakapauli sa Mindanao ang mga badjao, may nag-upod sa mga ini nga mga badjao nagikan sa Mabinay, Negros Oriental nga luyag man kuntani magpauli.
Apang, wala ang mga ini ginpasaka sa barko bangud nga wala sila sang acceptance letter kag travel pass kag ang ticket nga nabakal ang para lamang sa 73 ka mga badjao nagikan sa Bacolod City.
