Kadungan sang pagkomemorar sang ika-82 nga anibersaryo sang Bacolod Charter Day kahapon, liwat nga ginpasiga ang Halandumon Tower sa Dalan Gonzaga matapos ang masobra isa ka tuig nga napunder ang mga suga sini.
Ang walo ka mga exterior towers nga octagonal shape ang nagasimbolo sang tubo nga ginakabig backbone sang Bacolod City kag probinsya sang Negros Occidental.
Madumduman nga Hunyo 2019 sang gin-inagurahan ang P4.8 million nga balor sang proyekto.
Ginpanginwala naman sang City Engineer’s Office nga overpriced kag substandard ini apisar nga nagkalapunder ang suga sang tower sang tinalikdan nga tuig.
Samtang padayon nga ginakay-o ang mga suga, sang Enero 24, 2020, gin-arado naman ini sang isa ka itom nga SUV kun sa diin nagkalaguba ang concrete barrier kag scaffoldings sa palibot sang tower.
Yara sa P300,000 ang estimated damage sang aksidente kag ginbayaran ini sang Korean national nga nagadala sang salakyan.
