Ginkumpirmar ni Bacolod City Mayor Evelio “Bing” Leonardia nga nagnubo sang 13% ang 2021 annual budget sang ciudad kun sa diin nagikan sa P3 billion sang tinalikdan nga tuig, yara na lang ini sa P2.6 billion sa 2021.
Aminado si Leonardia nga madamo sang mga departamento ang apektado apang nagpasalig ini nga ang budget sa City Health Office ang indi maapektuhan bangud dako katama ang papel sini ilabi na nga sa karun nga may ginapangatubang nga pandemic.
Samtang, ginalauman nga magahalin na sa Bacolod City si Inter-agency Task Force Chief Implementer for Visayas General Melquiades Feliciano sa katapusan sang bulan sang Oktubre.
Sa pahayag ni Feliciano sa ginpatigayon nga meeting sang Emergency Operations Center kahapon, nagapati ini nga mangin estable na ang sitwasyon sang coronavirus sa ciudad sa katapusan sang bulan.
Suno sa iya, sa ikatatlo kag ikaapat nga semana sang Setyembre, may average nga 50 ka mga kaso kada adlaw ang ciudad.
Samtang sa una ka ikaduha naman nga semana sang Oktubre, yara na lang sa 25 ka mga kaso ang average daily cases kag ginalauman nga maganubo pa gid sa masunod nga mga semana.
Nakit-an man sini ang coordinated, collaborated kag harmonized nga mga tikang sang tanan nga cluster heads sang EOC kag kumpiyansa ini nga kun maghalin na siya sa ciudad, masarangan sang grupo ang pagkontrolar sang virus bangud man sa mga system kag practices na nga natukod.
Tuman naman ang pagpasalamat ni Leonardia kay Gen. Feliciano kag sa tanan nga mga opisyales nga ginpadala sang national IATF sa ciudad agud matapna ang COVID-19.
Suno kay Leonardia, nangin madinalag-on sanday Feliciano sa ila mission sa Cebu subong man diri sa Bacolod gani dako ang iya pagpasalamat diri.
Gindugang man sini nga dako ang ila ginsakripisyo kaangay nalang sang indi pagtambong sa kaadlawan sang ila pamilya agud magbulig sa ciudad.
Suno sa alkalde, makit-an nga nagnubo na ang kaso sang COVID sa Bacolod gani nagrequest ini sa national IATF nga ide-escalate ang ciudad sang modified general community quarantine (MGCQ) halin sa general community quarantine (GCQ).
Suno sa iya, ang nasambit nga tikang ang iya man nga ginkonsulta kay General Feliciano.
