19 sa 61 ka mga barangay sa ciudad sang Bacolod ang gindeklarar na nga COVID free sa nakaligad nga duha ka semana.
Sa interview sang Bombo Radyo kay Mayor Evelio “Bing” Leonardia, gin-abisuhan sini ang 19 ka mga barangay nga ginalakipan sang Brgy. Punta Taytay, Brgy. 4, 9, 11, 12, 13, 14, 15, 20, 23, 24, 25, 26, 27, 29, 31, 33, 36 kag 38 nga imintinar ang COVID free nga rekord.
Ginhangkat man ni Leonardia ang nabilin nga mga barangay sa ciudad nga maglagas kag tinguhaan nga mangin COVID free man.
Gindayaw man sini ang mga punong barangay ilabi na si Association of Barangay Captains President Lady Glez Pallen nga dako ang nangin papel sa pagnubo sang kaso sang virus sa ciudad.
Suno sa alkalde, apisar nga naganubo na ang kaso sang coronavirus sa Bacolod, indi dapat magpakampante ang mga pumuluyo gani nagpangayo ini sang kooperasyon sang tanan agud gilayon na nga matapna ang balatian.
Samtang ginkumpirmar ni Bacolod City Admistrator Em Ang nga 212,000 na ka mga residente sang ciudad ang nakaparehistro sa Bacolod Contract Tracing (BACTRAC) System.
Suno kay Ang, 5,890 ka mga establishmento ang rehistrado naman.
Suno naman sa alkalde, dako na ini nga porsyento sa adult population sa ciudad bangud ang Bacolod City ang may yara sang populasyon nga 240,000.
