Nagdangat sa P350,000 ang balor sang halit nga ginbilin sang paglabay sang buhawi sa Sitio Passing Truck, Brgy. Minapasuk, banwa sang Calatrava sang Miyerkules sang udto.
Sa interview sang Bombo Radyo kay Calatrava Municipal Disaster Risk Reduction and Management Office Head Ray Suminguit, nadugangan sang duha ka balay ang totally damaged kag 18 naman ang partially damaged bangud sa buhawi nga naglabay sa nasambit nga sitio kag nagdugay sang 10 tubtob 15 minutos.
Maluwas sa mga panimalay, nakakas man ang atop kag mga bintana sang Passing Truck Day Care Center.
Wala naman sang may napilasan sa mga residente.
Suno kay Suminguit, apisar nga nagkalahukas ang mga atop kag naguba ang pila ka mga panimalay, wala ang mga pumuluyo nagpadulong sa evacuation center kag mas ginpili sang mga ini nga magtinir sa ila mga himata ukon tupad balay.
Nasarangan naman sang barangay level ang paghatag sang ayuda sa mga residente kag ginproseso na sang LGU ang mga papeles sang mga apektado sang naglabay nga buhawi kag ipasa sa DSWD kag pagpanghanda man ingkaso nga pangitaan sila sang probinsya.
