Patay ang anay CAFGU member matapos ginlambatan kag gintiro sang wala makilal-an nga mga suspetsado sa Sitio Sambulong 1, Brgy. Paitan, Escalante City, Negros Occidental sang Martes sang aga.
Sa interview sang Bombo Radyo Bacolod kay P/Staff Sgt. Janry Lopez, imbestigador sang Escalante City Police Station, ang biktima ang ginkilala kay Julieto Limbaga, 45 anyos kag residente sang Proper Paitan, Brgy Paitan, Escalante City, Negros Occidental.
Suno kay Lopez, nagasakay sa motorsiklo ang biktima sang ini ang ginpapundo sang wala makilal-an nga armado nga mga tawo kag sa wala mahibaluan nga rason, gintiro nila ang biktima.
Ginahulat pa ang resulta sang post mortem examination sa biktima agud mahibaluan kun sa diin ang igo sini nga gintunaan sang iya kamatayon.
Narekober sa crime scene ang apat ka fired cartridge case sang m16, duha ka fired cartridge case sang 9mm kag isa ka fired bullet.
Padayon pa sa karun ang hot pursuit operation sang Escalante City Police Station sa mga suspetsado matapos nga nagpalagyo sa nabukid nga bahin sang syudad pagkatapos ang krimen.
