Masobra 100 mil pesos nga balor sang iligal nga droga ang nakumpiskar sang mga kapulisan nagikan sa duha ka manunudlo sa probinsya sang Negros Occidental nga nadakpan sa buybust operation kahapon.
Nadakop sang mga kapulisan si Stephen Arricivita, 40 anyos kag residente sa Adela Street, Barangay 2, Kabankalan City sa buybust operation nga ginpatigayon sa Purok Masinadyahon, Barangay Caradio-an, Himamaylan City.
Suno kay P/Maj. Romeo Vargas, hepe sa Himamaylan City Police Station, nagpangayaw pa ang public school teacher sa ciudad sang Himamaylan para magbaligya sang shabu.
Si Arricivita ang nagatudlo sa Kabankalan City National High School.
Matapos nga mabaklan sang P500 nga balor sang shabu, nakuha pa sa paghinakop sang manunudlo ang dugang nga 10 ka sachet sang iligal nga droga.
Ang kabug-usan nga shabu ang nagabug-at sang 5.6 grams kag ginabanta nagabalor P95,000.
Masobra isa ka bulan naman nga ginmonitor ang suspetsado kag nahibaluan nga masami nagadala sang gamay nga bag sa eskwelahan nga ginasudlan naman sini sang iligal nga droga.
Samtang nadakop naman sang mga kapulisan sa isa ka vulcanizing shop sa Talisay City si John Paul Insular sang Octagon Village, Barangay Zone 15 nga nagatudlo sa Technical Education and Skills Development Authority (TESDA) sa nasambitan nga ciudad.
Suno kay P/Maj. Jigger Gimono, hepe sang Talisay City Police Station, si Insular ang isa ka high value individual (HVI).
Kaupod man nga nadakpan si Joenefer Juson sang Purok Kabulakan, Zone 10, Talisay City nga newly identified drug personality.
Nakuha sa paghinakop sang duha ang suspected shabu nga nagabalor P34,000.
