Lauman sa session sang Sangguniang Panlungsod nga patigayunon sa masunod nga semana nga ipaidalom na sa first reading ang 2021 Annual Budget sang Bacolod City.
Madumduman nga ginkumpirmar ni Mayor Evelio “Bing” Leonardia sang Lunes nga nagnubo sang 13% ang annual budget sang ciudad para sa 2021 kun sa diin nagikan sa P3 billion sang tinalikdan nga tuig, yara nalang ini sa P2.6 billion.
Sa interview sang Bombo Radyo kay Councilor Cindy Rojas, chairman sang Committee on Finance and Appropriation sa SP, ginpahayag sini nga apisar sang pagnubo sang budget, wala sang buhin ang kwarta nga igaalokar para sa City Health Office kag may posibilidad nga mas magtaas pa ini kun ikumparar sa budget subong nga P169 million.
Suno kay Rojas, ini bangud dako ang papel sang CHO sa karun nga may ginapangatubang nga COVID pandemic.
Gina-engganyo man sini ang mga komitiba nga magtambong sa committee hearing agud kun may pamangkot, ini ang madiskusyunan kag malantaw na agud indi na maglawig ang diskusyon sa second reading.
