Gin-athag sang City Administrator nga indi magabayolar sa data privacy act ang Bacolod Contact Tracing (BaC-Trac) system.
Suno kay Bacolod City Administrator Em Legaspi – Ang, naka-apid mismo sa ordinansa nga sunod sa National Privacy Act ang system.
Pahayag pa sini nga masami naman nagahatag sang personal information sa social media accounts, telepono, video games, pagbakal online kag iban pa nga mas indi nagid mabantayan ang privacy sang mga datos.
Paathag pa sini nga basic information lang ang ginapangayo sa BaC-Trac system.
Nagapasalig naman ang City Administrator nga gintukod lang gid ang BaC-Trac system para sa contact tracing kag wala na sang iban pa.
Samtang isa lang ang Data Protection Officer nga ginbutang nga sarang maka-access sa mga impormasyon.
Samtang gin-athag man sang City Administrator nga libre ang BaC-Trac System.
Ini kasunod nga madamo sang mga persona nga gina-negosyuhan ang pagparehistro sa system.
Pahayag ni Ang nga yara na sa persona kun makagat ini sa mga nagapanukot kabaylo sang serbisyo kag dugang pa sang printing services.
Apang ginpasalig sini nga nakahanda nga magbulig ang mga Barangay sa mga residente nga luyag magparegister sa system apang wala sang internet connection ukon nagakaigo nga gadget kag wala ang mga ini nagapanukot sang bayad.
Dugang pa sini nga umpisa lang naman kinahanglan ang gadget kag indi na ini kinahanglan kun may-ara na sang QR code.
