Isa ka semana antes ang Pista Minatay, nagsugod na sa pagsindi sang kandila ang pila ka mga residente sa ila mga himata nga nalubong sa Burgos Public Cemetery.
Sa interview sang Bombo Radyo Bacolod kay Ricardo Repogio, caretaker sang patyo, ginpahayag sini nga naga-amat-amat na karon damo ang nagabisita sa Burgos Public Cemetery apang hugot sini nga ginapatuman ang proper health protocol.
Suno kay Repogio, ginapunggan gid sini ang pagtumpok-tumpok sang mga bisita.
Iya man ginalimitahan sa 10 tubtob 15 lamang ka miyembro sang pamilya ang makabisita sa ila mga nagtaliwan nga himata samtang 10 tubtob 20 ka mga persona naman ang mahimo makatambong sa lubong.
Wala naman sini ginatugutan nga makasulod sa patyo ang mga pasaway kag wala nagasunod sa pagsulundan.
Suno sa iya, kada alas-10:00 sang aga kag alas-3:00 tubtob alas-4:00 sa hapon gid madamo sang nagabisita sa patyo.
Nahibaluan nga pagasiraduhan ang mga patyo sugod Oktubre 29 tubtob Nobyembre 4 agud malikawan ang pagdinagsa sang mga tawo kag mapunggan ang local transmission sang coronavirus.
