Ginkumpirmar sang deputy station commander sang Moises Padilla Municipal Police Station nga ang walo ka tuig nga magulang nga babayi lang ang nagabantay sa isa ka tuig nga bata nga babayi nga nalumos sa sapa sa Barangay Guinpana-an kahapon sang aga.
Sa interview sang Bombo Radyo Bacolod kay P/Lt. Johnny Oro, ginpahayag sini nga nagatrabaho sa kampo ang ginikanan sang biktima gani nga ginabilin sila nga mag-utod sa balay sang ila lolo kada aga.
Suno kay Oro, yara sa sulod sang balay sang ila lolo ang mag-utod kag nagahampang bangud nga naga-ulan sang hinali nalang nga wala na nakit-an ang biktima.
Suno sa iya, posible nga nagtamwa ini sa pwertahan.
Nahibaluan nga lima lang ka metros ang kalayuon sang balay sang ila nga lolo sa sapa.
Dugang pa sini nga dulhugon ang duta kag naka-sentro pa ang pwertahan sang balay sa amo nga sapa.
Mga alas-7:00 kahapon sang aga sang nadula ang biktima kag pasado alas-9:00 na kahapon sang aga sang nasapwan nga nagautaw-utaw ang bata sa sapa.
