Gilayon man nga nagbalik sa paglayag ang roro vessel nga nagabiyahe Dumangas-Bacolod vice versa matapos temporaryo nga nag-untat kaina sang kaagahon bangud sa mabaskog nga hangin kag pagbalod dala sang Bagyo Quinta.
Sa interview sang Bombo Radyo Bacolod kay Commander Jansen Benjamin, pinuno sang Coast Guard Station-Negros Occidental, ginpahayag sini nga apisar wala sang storm warning signal sa probinsya, temporaryo nga gin-hold ang biyahe sang mga roro vessel nga nagalayag Dumangas-Bacolod vice versa bangud sa malain nga panahon.
Apang, gilayon naman ini nga nag-resume kaina sang aga.
Suno kay Benjamin, wala man sang reported nga stranded cargos sa amo nga ruta subong man sa Tabuelan-Escalante ports kag San Carlos-Toledo ports.
Samtang, kanselado naman ang biyahe sa Sagay-Estancia ports bangud nga may yara sang storm warning signal sa banwa sang Estancia.
Nagpanugyan naman si Benjamin sa publiko nga imonitor gid ang weather forecast.
Ginpahanumduman man sini ang mga mangingisda nga likawan anay ang pagpalawod ilabi na subong nga may yara sang bagyo bangud indi mapaktan ang lakat sang panahon.
