Kabug-usan nga 224 ka pamilya kag 808 ka mga indibidwal ang naapektuhan sang nagluntad nga pagbaha tuga sang mabaskog nga ulan sa ciudad sang Sipalay sang Domingo, Oktubre 25.
Sa interview sang Bombo Radyo kay City Disaster Risk Reduction and Management Office Head Dionelo Bogta-e, ginpahayag sini nga ang Barangay Marikalum, Brgy. Mambaroto, Brgy. Gil Montill, Brgy. Cabadyangan, Brgy. Nauhang kag Brgy Nabolao ang naapektuhan sang pagbaha.
Suno kay Bogta-e, may nagluntad nga landslide sa Sitio Pagipagihan, Brgy. Marikalum kun sa diin nagkalatumba ang mga poste.
Lunes sang gab-i, nag-evacuate ang mga pulumuyo sang nasambit nga mga barangay apang nakabalik na kahapon sang aga sa ila mga puluy-an bangud nagnubo na ang tubig.
Suno sa CDRRMO Head, may isa ka balay sa ciudad nga totally damaged bangud sa baha apang wala naman sang may nasamaran nga pumuluyo.
Samtang, nagsubside naman ang baha sa banwa sang Binalbagan.
Suno kay Binalbagan LDRRMO head Engr. Jernie Rondin, ang mga barangay nga apektado sang baha ang ginalakipan sang Enclaro, San Vicente, Paglaom, Canmuros, Marina kag Bagroy.
Nagadangat naman sa 56 ka mga indibidwal sa Sitio Aslom, Barangay Marina ang gin-evacuate sang rescue team nagikan sa masobra 300 ka mga pamilya nga apektado sang baha.
Suno kay Rondin, naglab-ot sa critical level ang tubig sa suba gani nagresulta sa evacuation.
Ginkalipay naman sini nga wala sang casualty sa nasambit nga pagbaha.
