Nagpapanaog ang korte sang temporary restraining order (TRO) batok sa joint venture agreement (JVA) sa tunga sang Bacolod City Water District (Baciwa) kag Prime Water Inc. nga maga-take effect sa Nobyembre 1.
Madumduman nga nag-file sang petition for preliminary injunction with prayer for TRO ang grupo nga Amlig Tubig batok sa JVA kag subong nga adlaw ang hearing sa Regional Trial Court Branch 45.
Tinutuyo sang injunction nga i-nullify ang JVA.
Sa interview sang Bombo Radyo Bacolod kay Councilor Wilson “Jun” Gamboa, convenor sang Amlig Tubig, dako na nga ligwa ang 20 ka adlaw nga TRO sang korte agud maka-preparar sila sa hearing sa Nobyembre 9.
Suno naman kay Atty. Lorendo Dilag, chairman sang Baciwa Board of Directors, husto ang tikang sang judge nga magpagwa sang TRO bangud wala pa nadesisyunan ang premilinary injunction.
Sa tion nga magsugod ang hearing, lantawon sang judge kun mahatag sang injunction batok sa JVA.
Sa tion nga indi madesisyunan ang injunction sa sulod sang 20 dias, iextend ang TRO apang kun paboran sang korte ang injunction, indi na madayon ang JVA sa Prime Water bangud permanente na ini nga ginpunggan.
Apang sarang pa man nga maka-appeal ang BACIWA.
Sa karon, wala pa nakahibalo ang Prime Water nga may grupo nga nagpasaka sang kaso batok sa JVA.
Samtang, bisan nagpagwa na sang TRO ang korte batok sa JVA, nagaplano naman si Gamboa nga magpasaka sang kaso administratibo sa Ombudsman batok sa Baciwa officials.
Subong nga hapon, nagpasaka man sang lain nga kaso ang unyon sang mga empleyado sang BACIWA.
