Ginkumpirmar ni Bacolod City Mayor Evelio “Bing” Leonardia nga pending pa ang request ni Bishop Patricio Buzon sang Diocese of Bacolod nga makapatigayon sang memorial mass sa mga patyo sa ciudad sa Nobyembre 1 kag Nobyembre 2, 2020.
Sa interview sang Bombo Radyo kay Leonardia, ginpahayag sini nga pending pa ang hingyo ni Bishop Buzon nga pahanugutan ang misa sa mga patyo kun sa diin sacristan lang ang upod sini kag wala gihapon sang may makasulod nga pumuluyo sa Piesta Minatay.
Suno sa alkalde, ginpasa niya ini sa regional inter-agency task force (RIATF) agud madesisyunan kag sa karun, ginahulat pa ang desisyon sang national IATF kun pahanugutan.
Suno sa iya, nagmando pa ini sa mga kapulisan sang Oktubre 28 nga siguraduhon nga wala sang tawo sa mga patyo bangud may iban nga memorial parks nga may mga kwarto.
Madumduman nga nagpagwa sang pagsulundan si Leonardia nga pagasiraduhan ang mga sementeryo sa Bacolod halin Oktubre 29 tubtob Nobyembre 4 bilang precautionary measure batok sa COVID-19.
