Indi anay pagbatakon ang gin-issue nga blue alert status ni Governor Eugenio Jose “Bong” Lacson sa probinsya bisan nga wala nadala sa tract ni Bagyo Rolly ang Negros Occidental.
Sa interview sang Bombo Radyo Bacolod kay Provincial Disaster Risk Reduction and Management head Dr. Zeaphard Gerhart Caelian, ginpahayag sini nga indi gid dapat mangin kampante nga wala nadala sa tract ni Bagyo Rolly ang probinsya bangud nga tuman naman ka kusog sang impact sang dala sini nga ulan.
Ginhalimbawa ni Caelian nga kaangay sa Bagyo Quinta, wala man sang storm warning signal nga ginpasaka sa Negros Occidental apang bangud sa madamol nga pag-ulan sini, naapektuhan gid ang southern portion sang probinsya kun sa diin madamo nga lugar ang ginbaha.
Suno diri, bisan indi malab-ot ni Bagyo Rolly ang super typhoon strength, mabaskog ini sa gihapon nga bagyo.
Liwat naman ini nga nagpahanumdom sa mga local government units (LGUs) nga ireview ang contigency plan subong man ang evacuation plan.
Suno kay Caelian, mas maayo nalang nga nakahanda ang tanan bangud nga indi mapaktan ang lakat sang panahon.
