Nangin matawhay kag wala sang nangin ano man nga problema nga nagluntad sa una nga adlaw sang pagbalik sang biyahe sang mga fastcraft nga nagalayag Bacolod-Iloilo vice versa.
Sa interview sang Bombo Radyo Bacolod kay Commander Jansen Benjamin, pinuno sang Coast Guard Station-Negros Occidental, ginpahayag sini nga maayo gid ang ila assessment sa una nga adlaw sang pagbalik sang biyahe.
Suno kay Benjamin, nagdangat sa 90 ka mga pasahero ang nagsakay sa first trip sang Oceanjet nga nagbiya sa Bredco Port alas-8:30 kaina sang aga.
Nahibaluan nga kapin 300 ka pasahero ang maximum capacity sang isa ka fastcraft kag 50% lamang sini ang pwede nila maakomodar bilang pagsunod sa minimum health protocol nga ginapatuman bangud sa COVID-19 pandemic.
Subong nga adlaw, ang Oceanjet kag Weesam Express lang ang nagbiyahe apang sugod bwas, Nobyembre 1, magabyahe naman ang Supercat kun sa diin may tag-isa lamang sila ka trip kada adlaw.
Samtang, ginkanselar naman ang biyahe sang 2Go nga may ruta Bacolod-Manila bangud sa Bagyo Rolly.
Suno kay Benjamin, natalana kuntani ini nga mag-depart sa Bredco Port kaina sang kaagahon apang temporaryo ini nga gin-hold.
Ginpapauli naman anay ang mga pasahero kag tawagan lang ang mga ini kun maga-resume na ang biyahe.
Ginkumpirmar man ni Benjamin nga naka-heightened alert status ang PCG bisan wala nadala sa track ni Bagyo Rolly ang Negros Occidental.
