Halos mga pamatan-on ang nagdonar sang dugo sa ginpatigayon nga bloodletting activity sang Philippine Red Cross in partnership with Dugong Bombo sa Barangay Villamonte, Bacolod City subong nga adlaw.
Suno kay Eloisa Marie Liza, donor recruitment officer sang Philippine Red Cross-Negros Occidental chapter, nagdangat sa 30 ang kabug-usan nga successful blood donors ang nagpakigbahin sa bloodletting activity.
Suno kay Liza, kalabanan sa mga nagdonar sang dugo ang mga pamatan-on nga kabahin sang Red Cross Youth.
Pinakabata sa mga blood donors ang nagaedad sang 17-anyos kag may yara sang parent’s consent.
Dugang pa ni Liza nga may mga walk-in donors naman nga nagpakigbahin matapos nila mabatian ang amo nga aktibidad sa Bombo Radyo Bacolod.
Liwat naman nga nagpang-agda si Liza sa mga pumuluyo nga magpasakop sa masunod pa nga bloodletting activity para sa bulan sang Nobyembre nga hiwaton sa banwa sang EB Magalona.
Samtang, nagapasalamat naman si Rizalde Alunan, focal person sang Red Cross Youth, sa tanan nga mga volunteers nga naghatag sang tiempo sa pagdonar sang dugo.
Suno kay Alunan, dako gid ang mabulig sang nakolekta nga dugo ilabi na sa mga nagakinahanglan sini.
Bilang pagpasalamat naman sa bulig nga nahatag sang Red Cross Youth ang nagtulod kay Emmanuel Labrador, 18-anyos kag taga-banwa sang Valladolid agud magdonar sang dugo.
Suno kay Labrador, luyag lamang niya nga mag-give back sa organisason nga madamo gid sang kaayuhan nga nahatag sa iya.
Nagpang-agda naman ini sa mga pamatan-on nga magpakigbahin sa Red Cross Youth agud nga makabulig sa iban nga mga nagakinahanglan.
