Liwat na nga pagabuksan sang provincial government sang Negros Occidental ang provincial capitol park kag lagoon sumugod sa Sabado, Nobyembre 7 apang subject gihapon sa health protocols.
Madumduman nga nagmando si Governor Eugenio Jose “Bong” Lacson nga siraduhan ang nasambit nga park sa publiko sang tinalidkan nga Marso agud malikawan ang mass gatherings nga makatuga sang posible nga paglapta sang COVID-19.
Suno kay Lacson, ang mga pagsulundan sa implementasyon sang community quarantine sa bilog nga pungsod ang nagapahanugot na sa indoor kag outdoor non-contact sports kag exercises, nga makabulig sa physical kag mental well-being sang mga pumuluyo sa probinsya.
Santo sa mga health protocols, limitado lang sa 50 ka mga persona ang pahanugutan nga makasulod sa lagoon kag antes ini, kinahanglan anay nga matsekyar ang ila temperatura, maglog-in sang ila detalye kag manghugas sang kamot.
Kinahanglan man nga mag-obserbar sang social distancing kag magsuksok sang face mask kag face shield.
Limitado naman sa walking kag jogging ang klase sang exercise nga sarang mahimo kag tubtob tatlo ka persona lang ang sarang nga makagroup exercise.
Ang mga naga-edad 18 tubtob 65 anyos lang ang pahanugutan nga makasulod sa park.
Ginmanduan man sang gobernador ang safety and security division sang provincial government agud magpatuman sang health protocols sa lagoon.
