Nagbalik sa sabak sang gobyerno ang anay squad leader sang New People’s Army (NPA).
Suno kay kay Maj. Cenon Pancito III, tagpamaba sang 3rd Infantry Division sang Philippine Army, bulontaryo nga nagsungka sa headquarters sang 15th Infantry Batallion sa Barangay Tiling, Cauayan, Negros Occidental ang ginkilala kay Jenny Montaño, 23 anyos, babayi kag residente sa Purok Maatop, Barangay Sanki, Hinobaan, Negros Occidental.
Kilala man ini sa mga alyas nga Kim, Sweet, Ken kag Keann nga anay squad leader sang Squad 2, Sentro de Gavidad Southwest Front sang CPP-NPA.
Ini grupo sini ang nagaoperate sa mga banwa sang Hinobaan, Ilog kag Candoni, Negros Occidental kasubong man sa banwa sang Basay kag Bayawan sa Negros Oriental.
kaupod man sa ginsurrender sini ang ginapanag-iyahan nga 357 cal. revolver nga may unod nga mga bala.
Si Monatño ang narecruit nga magsulod sa NPA sadtong 2016.
Nahibaluan nga tatlo sa mga anay kaupdanan sini ang una na nga nagsungka sa gobyerno.
Sang nakita naman sini nga nangin maayo ang kahimtangan sang mga nagsungka, nangin inspirasyon naman ini agud nga magsungka man si Montaño sa otoridad.
Pahanumdom ni Pancito nga ginawelcome sang nila ang tanan nga mga katapo sang NPA nga luyag magsurrender sa hanay sang gobyerno.
Padayun man sini nga ginapanawagan nga dapat buksan na ang paminsarun kag makita nga indi sulosyon ang armado nga pakikipagbaka sa mga problema sa pungsod kasubong man sa kaugalingon.
