Dakop ang isa ka persona sa drug buybust operation nga ginpatigayon sang City Drug Enforcement Unit (CDEU) sa Purok Langis, Barangay Banago, Bacolod City kahapon.
Suno sa pahayag sang CDEU Team Leader, ang suspetsado ang ginkilala kay John Mark Equibal alias Yobyob, 22 anyos, residente sa Purok Sigay, Barangay 2, Bacolod City kag isa ka High value Individual (HVI).
Ginkabig ini nga HVI bangod una na ini nga nadakpan sadtong 2017 bangod man sa iligal nga droga kag nakagwa sa prisuhan sang Enero 2019 apang liwat naman nga nagbalik sa pagbaligya sang droga.
Tatlo man ini ka semana nga ginmonitor antes nga madakop bangod nangin maalam na ini sa pagbuhat sang iligal.
Ang iligal nga droga nga nakuha sa paghinakop sang suspetsado ang nagabug-at 10 gramo kag may estimated market value nga P68,000.
Yara naman sa paghinakop sang Police Station 3 ang suspetasdo kag natalana nga magpangatubang sang kaso nga pagbayolas sa RA 9165 ukon comprehensive dangerous drugs act of 2002.
Samtang nahibaluan man nga ang balay nga ginpatigayunan sang iligal nga transaksyon ang wala ginapanag-iyahan sang suspetsado kag yara sa Manila nagatinir ang orihinal nga nagarenta sa lugar.
