Ginpasiguro sang presidente sang League of Municipalities of the Philippines-Negros Occidental chapter nga magasunod sila sa mando sang Department of the Interior and Local Government nga padayunon ang road clearing operations.
Sa interview sang Bombo Radyo Bacolod kay Valladolid Mayor Enrique Miravalles, presidente sang League of Municipalities of the Philippines-Negros Occidental chapter, ginpahayag sini nga ongoing na ini nga programa apang naatrasar lang bangud sa coronavirus pandemic.
Suno kay Miravalles, tumanon gid ini dapat sang kada local government unit ilabi na sang kada barangay bangud nasuguran naman ini nga programa.
Samtang, gin-athag naman ni Punong Barangay Anabelle Bermudo, Association of Barangay Captains (ABC) president sa La Carlota City nga wala pa sila nakabaton sang order ukon memorandum nagikan sa DILG.
Wala pa man nakapapanaog sang executive order ang ila alkalde angot sa pagpadayon sang road clearing operations.
Suno kay Bermudo, wala gid sang problema kun padayunon ini nga programa bangud nga para man ini sa ikaayo sang tanan.
Suno sa iya daw kaangay na man lang nga follow up ang matabo bangud nga nasuguran na ini sadto.
Nagahingyo ini sa publiko nga suportahan kag magkooperar sa ginapatuman sang gobyerno.
