Ginkumpirmar ni Valladolid Mayor Enrique Miravalles nga nagpasalig naman ang provincial government sang Negros Occidental nga magahatag man sila sang bulig sa mga watchers sang pasyente sa Corazon Locsin Montelibano Memorial Regional Hospital.
Sa interview sang Bombo Radyo Bacolod kay Miravalles nga presidente man sang League of Municipalities of the Philippines-Negros Occidental chapter, ginpahayag sini nga nakaistorya na sila ni Provincial Administrator Atty. Rayfrando Diaz kag nagpasalig ini nga ipalab-ot niya kay Negros Occidental Governor Eugenio Jose “Bong” Lacson ang amo nga isyu.
Samtang, ginkumpirmar naman ni Miravalles nga sarang maka-akomodar sang tubtob 150 ka mga persona ang pasilidad nga ila gin-rentahan agud matiniran sang mga watchers sang CLMMRH.
Suno sa alkalde, nalakip na diri ang kuryente, tubig, suga, banyo kag beddings.
Gindugang pa sini nga ma-amot-amot man sila nga mga alkalde para sa pagkaon sang mga watchers.
Tuman man ang iya pagpasalamat kay Punong Barangay Madeline Diaz sa pagsapupo sa mga naalangan nga mga watchers.
Nahibaluan nga ginadumili na sa sulod sang ospital ang mga manugbantay agud malikawan ang coronavirus transmission.
