Isa ka katapo sang New Peoples Army (NPA) ang napatay sa nagluntad nga engkwentro sa tunga sang rebelde nga grupo batok sa militar sa banwa sang Moises Padilla, Negros Occidental.
Suno kay Maj. Cenon Pancito III, tagpamaba sang 3rd Infantry Division sang Philippine Army, nagresponde ang 62nd Infantry Battalion sa report nga may mga persona nga ginasuspitsuhan miyembro sang Communist Terrorist sa Sitio Arum, Barangay Macagahay, Moises Padilla, Negros Occidental sang Huwebes.
Tatlo ka mga Communists NPA Terrorist nga miyembro sang Yunit Militia ang na engkwentro sang tropa.
Ang pagbayluhanay sang lupok ang nagtuga sa pagkapatay sa katapo sang NPA nga ginkilala kay Rio Jacaba samtang ang duha naman ang gilayon nga nagpalagyo padulong sa separado nga dereksyon.
Narecover sa lugar ang isa ka 45 caliber pistol kag mga subersibo nga mga dukomento nga ginapatihan gamit sang mga ini sa pagpatigayon sang “mass works”.
Gilayon naman nga nagresponde ang Moises Padilla Municipal Police Station agu magbuhat sang imbestigasyon samtang ginhemus naman sang scene of crime investigation ang bangkay para sa nagakaigo nga disposisyon.
Nagapamatuod naman ang engkwentro nga may presensya sang PNP sa lugar.
