Nagakaangay lang suno sa bise alkalde sang syudad sang Bacolod ang liwat nga pagpatuman road clearing operations sa syudad santo sa ginpapanaog nga memorandum sang Department of Interior and Local Goverment (DILG).
Sa inteview sang Bombo Radyo Bacolod kay Vice Mayor El Cid Familiaran, ginpahayag sini nga nagakadapat lang nga ipatuman liwat ang road clearing operations bangud may yara sang nagbalik sa lugar nga una nga nalakip sa road clearing.
Suno diri, dapat man nga istriktuhon ang pagpatuman sang road clearing bangud madamo ang nagapinasaway nga nagapatindog sang mga puluy-an apisar nga indi nagakadapat nga patindugan.
Nagpanawagan man ini sa mga pumuluyo nga sundon ang layi ukon mga polisa nga ginapatuman sang gobyerno.
Samtang, ginpahayag man ni Assistant to the Mayor Butch Soliguen nga nabaton na nila ang memorandum sang DILG kag natalana sa madason nga semana ang pagpanagtag sini sa 61 ka barangay sa syudad.
Sa tion nga may compliance ang barangay, ireport ini kay Soliguen kag siya naman ang maconsolidate kag ipasa sa DILG.
Madumduman nga may yara na sang 87% na ang completion sa road clearing operations sa syudad antes pa man ini ginsuspend sang DILG.
