Promisa sang gobyerno nga mahatag sang bulig ang ginasaligan sang mga pamilya sang mga pinoy crew nga nalakip sa naglugdang nga cargo vessel sa Japan sadtong Setyembre.
Sa interview sang Bombo Rayo kay Justine Payas, asawa ni Andren Payas nga isa ka crew sang Gulf Livestock 1, ginpahayag sini nga nagalaom sila nga mabuligan sang kompaniya ang mga pamilya sang mga crew nga nalakip sa naglugdang nga cargo vessel.
Dugang pa sini nga nagapadayon man ang search and rescue apang wala sila sang update.
Suno kay Payas, wala sang ginhatag nga bulig ang kompaniya sa apektado nga pamilya sang mga crew, sabaylo gin-untat pa ang ila nga allotment.
May yara man sang representative ang kompaniya nga nagaatubang sa ila apang wala man ini sang update angot sa bulig nga mahatag sang kompaniya.
Suno diri, ginahulat na lamang nila ang update nagikan sa MARINA partylist nga magahimo sang task force kaupod ang Overseas Workers Welfare Administration kag Department of Foreign Affairs nga magrescue sa mga crew.
Dako man ang paglaom sini nga buhi pa ang iya nga bana kag yara lang ini sa isa ka isla sa Japan nga indi makita sang rescuers.
