42 ka mga kaso sang coronavirus disease ang dugang nga narekord sa Bacolod City samtang 15 naman sa Negros Occidental.
Sa COVID-19 Regional Case Bulletin No. 224 nga ginpagwa sang Department of Health Western Visayas, nadugangan sang 102 ka mga kaso ang Region 6.
Sa nasambit nga numero, 10 diri ang nagikan sa Iloilo; 42 sa Bacolod; 15 sa Negros Occidental; 16 sa Iloilo City; kag napulo sa Aklan.
Bangud diri, nagdangat na sa 17,455 ang kabug-usan nga kaso sang coronavirus sa Western Visayas kun sa diin 2,784 ang aktibo.
Nadugangan man sang 133 ang mga nag-alayo sa balatian gani yara na sa 14,236 ang kabug-usan nga recoveries.
Nagsaka man sa 435 ang death toll matapos madugangan sang anum ka mga nagtaliwan bangud sa virus.
Sa karun, yara na sa 4,935 ang kabug-usan nga kaso sang COVID-19 sa Bacolod kun sa diin 296 ang aktibo; 4,496 ng nag-alayo; kag 143 ang nagtaliwan.
Samtang, nagdangat na sa 4,873 ang kaso sa Negros Occidental kun sa diin 1,517 ang active cases; 3,267 ang recoveries; kag 89 ang fatalities.
