Gin-athag sang tagpamaba sang Bacolod City Police Office (BCPO) nga kalabanan sa mga pulis ang gindeploy sa contact tracing team kag kun kaisa may ginarespondehan man sila rason kun ngaa may mga lugar nga wala nila nagaka-rovingan sa ciudad.
Ini kaangot sang nagluntad nga pagtililipon sa Art District, Barangay Mandalagan sang tinalikdan nga semana kun sa diin makit-an sa isa ka video nga nagasalalaot ang mga kabataan, wala nagsuksok sang facemask kag wala naga-obserbar sang social distancing.
Sa interview sang Bombo Radyo kay Police Lt. Col. Ariel Pico, ginpahayag sini nga ginrefer na ang nasambit nga bayolasyon sa local interagency task force (IATF) agud mahimuan sang nagakaigo nga tikang subong man sa local kag regional DILG.
Suno kay Pico, masami nga nagaroving ang mga pulis agud magmonitor kun ginasunod sang mga establishmento ang mga health protocols apang kun kaisa, may mga lugar sila nga indi malab-ot bangud may yara man sila sang ginarespondehan kag 144 ka mga personnel ang gindeploy sa contact tracing team.
Indi man sini mabasol ang mga tag-iya sang establishmento bangud kun kaisa amu nalang ini ang pamaagi agud makabawi-bawi ang ila negosyo apang indi dapat makompromiso ang mga ginapatuman nga health protocols.
Bangud diri, suno sa tagpamaba, nagdeploy naman sang mga personnel sa Art District kag iban nga mga establishmento sa ciudad agud magmonitor kun ginapatuman ang mga pagsulundan.
Nagpahanumdum man ini sa mga pumuluyo nga indi pagkalipatan nga yara pa sa General Community Quarantine (GCQ) ang Bacolod gani indi dapat magpakampante ukon magpinagusto sa pagiho.
