Ginkumpirmar sang presiding officer sang Sangguniang Panlalawigan nga ginsuguran na kahapon ang deliberasyon sa 2021 proposed budget sang Negros Occidental.
Sa interview sang Bombo Radyo kay Vice Governor Jeffrey Ferrer, ginpahayag sini nga kahapon kag subong nga adlaw ang gintalana nga schedule sang budget deliberation sang SP samtang sa Nobyembre 18 kag 19 naman ini magaresume sa masunod nga semana.
Suno kay Ferrer, ang mga miyembro sang finance committee, mga staff kag department heads nga nakaschedule nga mag-atubang lang ang ginapahanugutan nga magsulod sa session hall sang SP sa tion sang deliberasyon.
Kahapon, ila gin-atubang ang Office of the Governor, Provincial Administrator, Provincial Accounting Office, Provincial Treasurer’s Office, Human Resource Department kag pila pa ka mga departmento agud istoryahan ang i-alokar nga pondo.
Suno sa iya, ila tinguhaan nga maaprubahan antes magtakop ang bulan sang Nobyembre ang kapin P4.5 billion nga proposed budget sang probinsya para sa masunod nga tuig.
