Preparado na ang Barangay Alacaygan, EB Magalona sa patigayunon nga blood letting activity in partnership with Dugong Bombo sa Sabado, Nobyembre 14.
Sa interview sang Bombo Radyo kay Punong Barangay Larry Sumpay, ginpahayag sini nga kada barangay sa banwa ang nagahiwat sang blood donation activity duha ka beses sa isa ka tuig.
Suno kay Sumpay, una na sila nga nakapatigayon sang blood donation sang tinalikdan nga Hulyo kag ginakalipay sini nga ila makaupod ang Bombo Radyo sa Sabado.
Suno sa punong barangay, iya ginmanduan ang mga Barangay Health Workers subong man ang mga barangay tanod nga makigbahin sa aktibidad apang kun indi sila qualified, sarang ang mga ini nga maka-engganyo sang iban nga pumuluyo nga magdonar.
Suno diri, sang tinalikdan nga blood letting activity, 28 ka mga persona lang ang ila ginlauman apang nagdangat sa masobra 50 ang mga donors gani nagapreparar na ini nga mangin madamo man ang makigbahin sa Nobyembre 14.
Nagapasalamat man ang punong barangay sa Bombo Radyo sa paghatag sang freebies nga Dugong Bombo Shirt agud malipay man ang mga pumuluyo nga nakigbahin sa pagluwas sang kabuhi paagi sa pagdonar sang dugo.
