Nagpasalig ang Deputy for Medical Data Analysis and Assessment sang emergency operation center (EOC) sang Bacolod City nga magapagwa sila sang opisyal nga statement sa masunod nga Lunes tuhoy sa nagluntad nga pagtililipon sa Art District, Brgy. Mandalagan, Bacolod City sang tinalikdan nga semana.
Sa ginpatigayon nga press briefing ni Dr. Chris Sorongon kaupod si Dr. Hector Gayares kahapon, ginpahayag sini nga nagapadayon pa ang ila nga konsultasyon nahanungod sa insidente gani indi pa sila makapagwa sang opisyal nga statement.
Apang suno kay Sorongon, lauman nga sa Lunes, maka-issue na ang EOC sang opisyal nga pahayag.
Suno sa iya, temporaryo nga ginsiraduhan ang Art District bangud nagapatigayon pa sang imbestigasyon sa mga kalan-an.
Nag-apelar man ini sa mga negosyante kag pumuluyo nga ipaiway lang anay ang mga leisure activities bangud napaidalum pa gihapon ang ciudad sa general community quarantine (GCQ).
Suno kay Sorongon, kinahanglan nga isustain ang pagsunod sa mga protocols bangud indi lang ang pagpanubo sang kaso ang ginatinguhaan sang EOC kundi ang pagpabalik sang ciudad sa new normal agud mangin matawhay na ang paggawi sang tanan.
