Ginkumpirmar sang district commander sang Philippine Coast Guard-District Southern Visayas nga ginbatak na ang suspension sang byahe sang barko bangud sa tropical cyclone wind signal sa Luzon kadungan sang pagwaswas sang Bagyo Ulysses kahapon.
Sa interview sang Bombo Radyo Bacolod kay Capt. Eduardo De Luna, commander sang Philippine Coast Guard District Southern Visayas, ginpahayag sini nga mga alas-7:00 tubtob alas-8:00 kagab-i sang nakahalin ang barko nga padulong kuntani sa Manila kag may karga nga183 ka mga indibidwal, tatlo ka rolling cargoes, isa ka motorsiklo, kag mga commercial container vans.
Kalabanan naman sa mga sakay sa barko ang nagikan sa probinsya sang Negros Occidental nga makabig naman nga mga locally stranded individuals (LSI).
Samtang, ginkumpirmar man ni De Luna nga nagbiya naman sa Bredco port ang Philippine Coast Guard vessel nga BRP Gabriela Silang matapos ini temporaryo nga nagpondo sa ciudad sang Bacolod tuga sang pagwaswas sang Bagyo Ulysses sa Luzon.
Mga alas-12:00 kaina sang kaagahon sang naghalin ang isa sa pinakadaku nga vessel sang Philippine Coast Guard sa Bacolod.
Nahibaluan nga padulong sa Virac, Catanduanes ang BRP Gabriela Silang agud magdul-ong sang ikaduha nga hugnat sang relief operations nga ginalakipan sang 7,500 packs sang mga relief goods kasubong man mga bugas para sa mga apektado ni Bagyo Rolly.
