Nakahanda na ang mga barangay sa ciudad sang Bacolod sa pagpadayon sang road clearing operation sumugod Nobyembre 16, 2020 tubtob Enero 15, 2021 santo sa mando ni Presidente Rodrigo Duterte.
Madumduman nga nagpagwa sang Memorandum Circular No. 2020-145 ang Department of the Interior and Local Government nga nagamando sa mga gobernador, alkalde, punong barangay kag pinuno sang Sangguniang Panlungsod nga padayunon ang road clearing operation nga una na nga naumpisahan apang nauntat bangud sa coronavirus pandemic.
Sa interview sang Bombo Radyo Bacolod kay Association of Barangay Captains (ABC) President Lady Glez Gonzales-Pallen, ginpahayag sini nga ila iga-prioritize ang mga primary roads sa bangud partial implementation pa lang ang ila pagahimuon bangud nga yara pa sa idalom sang general community quarantine ang ciudad.
Dugang pa sini nga kada barangay ang magapatigayon sang clustering ilabi na sa mga dalagkuan nga barangay.
May yara man sang mga team para sa road clearing nga ideploy ang kada barangay.
Pila sa mga ginalantaw sini nga mangin problema amo nga madamo sang mga vendors ang nagbalik baligya sa sidewalk dala sang pandemic, may yara sang mga illegal settlers nga makaluluoy man kun pahalinon, kakulang sa manpower sang barangay bangud kadamuan sa mga ini ang naga-responde sa COVID response kag ang kakulang sa equipment para sa towing sa mga naga-illegal parking.
Samtang, nagpahanumdom naman ini sa publiko nga ipaiway anay ang pagpatigayon sang mga party ukon pagtililipon bangud sa ginapangatubang nga coronavirus pandemic.
