Ginbasura sang Negros Occidental Provincial Prosecutor’s Office ang apat ka counts sang murder nga ginpasaka batok kanday Moises Padilla Mayor Ella Garcia-Yulo, Vice Mayor Adrian Ian Villaflor, pila ka miyembro sang Sangguniang Bayan, anay Isabela Mayor Joselito Malabor, Vice Mayor Renato Malabor Jr. kag pila ka iban pa bangud sa kakulang sang ebidensya.
Sa interview sang Bombo Radyo Bacolod kay Atty. Jomax Ortiz, legal counsel sang mga akusado, ginpahayag sini nga ila gid ginakalipay gid sang 15 tanan ka mga respondents ang pagdismiss sa apat ka mga murder cases nga ginpasaka sadtong Marso 16, 2020 sang pamilya sang apat ka mga lalaki nga ginpatay sa banwa sang Moises Padilla sang 2016 tubtob 2018.
Gina-alegar sang mga complainants nga ang mga akusado ang kahimbon sang mga suspek sa pagpamatay kanday Rusty Caminade, Jose Joerito Amable, Michol June Ruales, kag Magdaleno Grande.
Una naman nga gin-ako sang New People’s Army nga sila ang sa likod sa kamatayon sang mga biktima.
Samtang, ginkumpirmar naman ni Ortiz nga nag-file sang motion for reconsideration ang mga complainants kun sa diin dungan nila ini nga nabaton upod ang resolusyon nga ginbasura na ang apat ka mga murder cases kahapon.
