Duha ang pilason kag naggutok ang dalagan sang trapiko sa pagkatumba sang truck nga nagakarga sang tubo sa highway sa Barangay Mabini, Valladolid, Negros Occidental kagab-i.
Sa interview sang Bombo Radyo Bacolod kay Mayor Enrique “Bebot” Miravalles, mahimo nga naglupok ang guma sang truck kag natumba ini.
Nagabiyahe sa north nga direction ang truck kag nasugata sini ang multicab, honda jaz nga puti kag tricycle.
Isa lang ang sakay sa multicab, apat sa Honda Jaz samtang ang tricycle naman ang nakalikaw sa kanal.
Wala naman masamad ang sakay sa auto bangud nakasandig ini sa poste sang kuryente kag naglupok man ang air bag sini samtang ang sakay naman sa tricycle ang nakalumpat man padulong sa humayan kag ginalantaw sang alkalde nga bakiras ang naagom sang sakay sini.
Nagpatawag sang payloader ang alkalde agud nga mapahigad ang mga tubo.
Ginpasalamatan man sini ang banwa sang Pulupandan sa gilayon nga pagpadala sang payloader agud nga matipon ang tubo kag gintawgan man sini si Gerry Sy para sa dugang nga pay loader.
Ginhingagaw man nga matipon ang tubo kag gintinguhaan nga mapahigad ang truck agud nga maagyan ang dalan.
Sa karon, yara sa Valladolid Municipal Police Station ang driver sang truck nga si Rovico Baldivia sang Barangay La Granja, La Carlota City kag natalana nga kasuhan.
Duha naman ang yara sa ospital nga sanday Ronald Tabarles, driver sang tricycle; kag ang babayi nga sakay sa carry nga si Anna Rose Villacampa sang Barangay Paloma, Valladolid.
