Ginkumpirmar sang hepe sang Valladolid Municipal Police Station nga ginbawian na sang kabuhi ang babayi nga driver sang multicab nga imbolbado sa pagkarambola sang mga salakyan bangud sa pagkatumba sang truck nga nagakarga sang tubo sa highway sa Barangay Mabini, Valladolid, Negros Occidental kagab-i.
Madumduman nga naglupok ang goma sang truck kag natumba ini.
Nagabiyahe sa north nga direction ang truck kag nasugata sini ang multicab, honda jaz nga puti kag tricycle.
Isa lang ang sakay sa multicab, apat sa Honda Jaz samtang ang tricycle naman ang nakalikaw sa kanal.
Sa interview sang Bombo Radyo Bacolod kay P/Capt. Wilfredo Benoman, hepe sang Valladolid Municipal Police Station, ginpahayag sini nga pasado alas-9:00 kagab-i sang ginbawian sang kabuhi ang driver sang multicab nga si Anna Rose Villacampa sang Barangay Paloma, Valladolid kag ginapahayag isa ka casual employee sang provincial capitol.
Samtang, padayon naman nga ginabulong sa ospital ang driver sang tricycle nga si Ronald Tabarles.
Suno kay Benoman nagapabilin pa sa kustodiya sang Valladolid PNP ang driver sang truck nga si Rovico Baldivia sang Barangay La Granja, La Carlota City kag depende pa kun may yara sang settlement nga matabo ukon wala.
Samtang, ginkumpirmar naman sang hepe nga yara pa sa lugar sang ginluntaran sang aksidente ang truck kag iban pa nga mga salakyan bangud nagakinahanglan sang husto nga equipment agud makuha ang truck kag dapat nga isirado ang highway.
