Nagalaom ang business sector sa Bacolod nga masolbar sang joint venture agreement (JVA) sa tunga sang Bacolod City Water District (Baciwa) kag Prime Water Infrastructure Inc. ang problema sa kakulang sang suplay sang tubig sa ciudad.
Nahibaluan nga nag-umpisa na kahapon ang pagserbisyo sang Prime Water sa 25 ka tuig nga JVA.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry (MBCCI), ginpahayag sini nga nagalaom ang business sector nga maka-istoryahanay sila upod ang Baciwa kag Prime Water agud istoryahan ang kaundan sang JVA.
Suno kay Carbon, luyag lamang nila mahibaluan kun bala may yara sang plano kag klaro nga kaladtuan ang amo nga kasugtanan.
Magluwas dira, luyag man sini mahibaluan kun paano kag san-o pakaayuhon sang JVA ang serbisyo sang Baciwa kag kun may yara bala sang dugang sa water rate bangud sa mas ginpakaayo nga serbisyo.
Isa pa sa mga palamangkutanon ni Carbon amo nga kun may yara sang bastante nga source sang tubig ang Prime Water agud isuplay sa Baciwa.
Paathag sini, isa ka highly-urbanized city ang Bacolod gani nagakinahanglan ini sang maayo nga suplay sang tubig para sa ikasanyog pa gid sang ekonomiya sa tunga-tunga sang ginapangatubang nga pandemya.
