Kapin P17,000 nga balor sang suspected shabu ang nakuha sa paghinakop sang mag-utod sa buybust operation sang Bacolod City Police Station 4 kahapon sang hapon sa Purok Hervias Dos, Brgy. Villamonte, Bacolod City.
Sa interview sang Bombo Radyo Bacolod kay Police Major Charles Gever, station commander sang police station 4, ginkilala ang mga suspetsado kanday Rolando Balatukan, 39 anyos, High Value Indivdual(HVI) bangud nakavail ini sang plea bargaining matapos nga madakpan man sa buybust operation pila na katuig ang nakaligad; Dennis Balatukan, 42 anyos , residente sang Purok Villa Auto, Brgy. Vista Alegre, Bacolod City kag Rogelio Balatukan,45 anyos kag residente sang Purok Hervias Dos, Brgy. Villamonte, Bacolod City.
Nakuha sa paghinakop sang mga ini ang walo ka elongated sachet sang suspected shabu kalakip na ang buybust item nga nagabug-at sang kapin 2.5 grams, P300 buybust money, P200 cash nga ginapatihan cash proceeds kag isa ka coin purse.
Suno kay Gever, may nagfeed sa ila sang impormasyon nga may nagabaligya sang illegal nga druga gani ginverify nila, bangud positibo ang impormasyon ginpatigayon ang buybust operation.
Nakahunong na sa Bacolod City Police Station 4 ang mga suspetsado kag natalana nga pasakaan sang kaso sa paglapas sang RA 9165 ukon Comprehensive Drugs Act of 2002.
